ललितपुर । ललितपुरको प्रसिद्ध रातो मत्स्येन्द्रनाथको रथयात्रा अन्तर्गत आज गाबहालबाट मंगलबजारसम्म रथ तानिँदैछ । वर्षा र सहकालका देवता मानिने मत्स्येन्द्रनाथको दर्शन र आशीर्वाद लिन बिहानैदेखि भक्तजनहरुको निकै ठुलो भीड लागेको छ ।
मंगलवार पुल्चोकबाट रथ तानेर गाबहाल पुर्याइएको थियो । रथयात्राका क्रममा पुल्चोकबाट गाबहालसम्मको यात्रा भव्य र उत्साहजनक रहेको स्थानीय बताउँछन् । आज गाबहालमा स्थानीय बासिन्दाहरूको पर्व अर्थात ‘जात्रा’ रहेको छ । जात्राका अवसरमा गाबहाल क्षेत्रमा बिहानैदेखि पूजा आराधना गर्ने श्रद्धालुहरूको घुइँचो लागेको छ ।
उपत्यकामा वर्षा गराउनको लागि मत्स्येन्द्रनाथलाई पुजिने धार्मिक विश्वास रहिआएको छ । आज मंगलबजार पुर्याइएपछि रथलाई केही दिन त्यहाँ राखिने र त्यसपछि अन्य गन्तव्यहरूमा लगिने परम्परा छ ।
