काठमाडौँ । कपिलवस्तुमा शनिबार बिहानदेखि सुरु भएको हिन्दु र मुस्लिम समुदाय बिचको विवाद टुङ्गिएको छैन । मुस्लिमहरूले ईद मनाउँदै गर्दा शनिवार महराजगञ्ज नगरपालिका–२ स्थित बरगदा र बहादुरगञ्ज क्षेत्रमा हिन्दु र मुस्लिम समुदायको बिचमा झडप भएको थियो ।
जिल्ला प्रशासन कार्यालयले महाराजगञ्ज बजार क्षेत्र हुँदै बर्गदी पुल र बहादुरगञ्ज चोकसम्म लगाएको निषेधाज्ञा अहिले पनि निरन्तर छ । विवाद समाधान गर्न अहिले सर्वदलीय र सर्वपक्षीय छलफल भइरहेको कपिलवस्तुका प्रमुख जिल्ला अधिकारी जनार्दन गौतमले रातोपाटीलाई बताए । उनले भने, ‘छलफल जारी छ, विवाद नटुङ्गिएसम्म निषेधाज्ञा जारी रहन्छ ।’
चैत ७ मा मुस्लिम समुदायका स्थानीयहरू बरगदाको मस्जिदमा नमाज पढिरहेको बेला नजिकैको रहेको मन्दिरमा डिजे बजाएपछि विवाद सुरु भएको कपिलवस्तुका एसपी सन्तोष आचार्यले रातोपाटीलाई बताए । चैते दसैँ नजिकिँदै गर्दा हिन्दु समुदायले पनि मन्दिरमा विभिन्न कार्यक्रम गर्ने धार्मिक परम्परा छ ।
घटनास्थलमा एकअर्काले मन्दिर र मस्जिद तोडफोड गरेका छन् । धार्मिक सहिष्णुता कायम राख्न सर्वपक्षीय छलफल गरेर निकास निकाल्ने प्रयासमा स्थानीय राजनीतिक दलका अगुवा र सरकारी अधिकारीहरू लागेका छन् ।
