काठमाडौँ । नेपाली कांग्रेसका नेता सचिन तिमल्सेनाले हालैको चुनावी पराजयको दोष सभापतिलाई मात्र दिनु अन्यायपूर्ण हुने बताएका छन्। सामाजिक सञ्जालमा एक पोस्ट लेख्दै उनले पार्टीको पछिल्लो दशकको सञ्चालन पद्धति र जनतासँगको टुट्दो सम्बन्ध नै हारको मुख्य कारण भएको औँल्याएका हुन्।
विशेष अधिवेशनले पार्टीमा केही उत्साह भरे पनि जनतामाझ सुधारको स्पष्ट सन्देश लैजान समय नपुगेको तिमल्सेनाको बुझाइ छ। चुनावी परिणामको नैतिक जिम्मेवारी लिँदै सभापतिले दिएको राजीनामाले उनको राजनीतिक उचाइ र नैतिकता झल्काएको भन्दै तिमल्सेनाले गर्व व्यक्त गरेका छन्। हारको जिम्मेवारी व्यक्तिभन्दा पनि पार्टीको गलत कार्यशैलीले लिनुपर्ने उनको ठहर छ।
उनले लेखेका छन्, ‘यो हारको जिम्मेवार तपाईं हुनुहुन्थेन दाइ, हाम्रो पार्टीको पछिल्लो दशकको सञ्चालन पद्धति थियो, जनतासँग पूर्ण रूपमा विच्छेद भएको सम्बन्ध थियो, मनपरी गठबन्धन थियो, भ्रष्टाचारका आरोप थिए, मूल्यहीन राजनीति थियो। जसको विरुद्ध तपाईंले नै लड्नु भयो र निरन्तर सुधारका मुद्दा उठाउनु भयो। तत्कालीन नेतृत्वले समय र जनताको भाव बुझिदिएको भए, विशेष अधिवेशनको नौबत नै आउने थिएन। विशेष अधिवेशनले कांग्रेसमा प्राण त भर्यो तर जनतामाझ सुधारको सन्देश लैजाने समय अपर्याप्त थियो।
पार्टी सभापतिको हैसियतमा रहेकाले चुनावी पराजयको जिम्मेवारी लिँदै तपाईंले दिएको राजीनामाले तपाईंको राजनीतिक कद झल्काउँछ। प्राउड अफ यू दाइ, गर्व छ!’
सम्वन्धित समाचार
:
