गोलबजार– मुस्लिम समुदायले इद पर्वको अवसरमा सार्वजनिक विदा घोषणा गर्न माग गर्दै गोलबजार नगरपालिकालाई औपचारिक रूपमा विद्यार्थी र मुस्लिम समुदायले ज्ञापनपत्र बुझाएको छ। सोमबार नगरपालिकाको कार्यालयमा उपस्थित मुस्लिम प्रतिनिधिहरूले नगर प्रमुखलाई उक्त ज्ञापनपत्र हस्तान्तरण गरेका हुन्।
ज्ञापनपत्रमा मुस्लिम समुदायको महत्वपूर्ण चाड इद उल-फित्रको दिनमा विद्यालय परीक्षा तत्काल स्थगित गरि स्थानीय तहबाट सार्वजनिक विदा घोषणा गर्नुपर्ने माग गरिएको छ। उनीहरूले धार्मिक तथा सांस्कृतिक विविधतालाई सम्मान गर्दै नेपाल सरकार तथा स्थानीय तहहरूले यस विषयमा आवश्यक कदम चाल्नुपर्ने उल्लेख गरेका छन्।
मुस्लिम समुदायको माग
ज्ञापनपत्र बुझाउने क्रममा समुदायका अगुवाहरूले नेपाल बहु-सांस्कृतिक तथा बहु-धार्मिक मुलुक भएको हुँदा सबै धर्म, संस्कृति, र परम्परालाई समान रूपमा हेर्नुपर्ने बताएका छन्। “इद पर्व इस्लाम धर्मावलम्बीहरूको महान् चाड हो। यस दिनलाई सरकारले राष्ट्रिय विदा दिन छाडेपछि हामीले स्थानीय तहसँग माग गरेका हौं,” एक मुस्लिम अगुवाले भने।
उनका अनुसार, विगतमा नेपाल सरकारले इद पर्वका लागि सार्वजनिक विदा दिने गरे पनि पछिल्लो समय त्यसलाई कटौती गरिएको छ, जसले मुस्लिम समुदायलाई असन्तुष्ट बनाएको छ।
नगरपालिकाको प्रतिक्रिया
गोलबजार नगरपालिकाका प्रमुख श्याम श्रेष्ठले मुस्लिम समुदायको मागलाई गम्भीर रूपमा लिने बताए। उनले नगरपालिकाको तर्फबाट समुदायको भावनालाई सम्मान गर्दै आवश्यक निर्णय गरिने प्रतिबद्धता जनाए। “हामी सबै समुदायका पर्व र चाडपर्वलाई सम्मान गर्छौं प्रमुख श्रेष्ठले भने।
समुदायको आग्रह
मुस्लिम समुदायले नेपालका विभिन्न स्थानमा इद पर्वको अवसरमा स्थानीय तहहरूले सार्वजनिक विदा दिने परम्परा रहेको उल्लेख गर्दै गोलबजार नगरपालिकाले पनि यस सम्बन्धमा सकारात्मक निर्णय लिने विश्वास व्यक्त गरेका छन्।
यस विषयमा थप निर्णय आउन बाँकी रहे पनि मुस्लिम समुदायले आफ्नो मागलाई सम्बोधन गर्न नगरपालिकालाई अनुरोध गरेका छन्। यदि माग पूरा नभए थप आन्दोलनका कार्यक्रम घोषणा गर्ने चेतावनीसमेत उनीहरूले दिएका छन्।