सुखिपुर मुन्ना गुप्ता ।हिन्दी वा नेपाली फिल्म छक्का–पन्जाकै झझल्को दिने दृष्य मंगलबार सिरहाको नवराजपुर गाउँपालिकाको एक विद्यालयमा देखिएको छ । त्यहाँ फिल्ममा देखाएझै अरुको साट्टोमा अर्को व्यक्तिले विद्यालयमा पढाइरहँदा भेटिएको छ ।

फिल्म छक्का–पन्जामा छोराका साट्टा बुबालाई काम गरेको देखाइएको थियो । तर, यहाँ श्रीमतिको साट्टोमा श्रीमान प्रअकै रुपमा काम गरेको देखिएको छ ।

ती प्रअ हुन, नवराजपुर गाउँपालिका ४ का जनकल्याण आधारभूत विद्यालयका अनिता यादव । मंगलबार उनको साट्टोमा श्रीमान्ले प्रअकै भूमिका काम गरिरहेको अवस्थामा अनुगमनको क्रममा भेटिएको छ ।

गाउँपालिका अध्यक्ष शिवउदगार यादव साढे ११ बजे विद्यालय अनुगमन गर्न पुगेका थिए । त्यहाँ श्रीमतिको ठाउँमा विन्दी प्रसाद यादव प्रधानाध्यापकको रुपमा काम गरिरहेको पाइएको थियो । विन्दीको श्रीमति अनिता यादव उक्त विद्यालयकी प्रअ हुन् । उनी अनुपस्थित थिए ।

गाउँपालिका अध्यक्ष यादवले विन्दीलाई किन श्रीमतिको साट्टोमा आएको ? कानूनले मिल्छ ? भनेर प्रश्न गर्दा विन्दीले किन आउन मिल्दैन मिल्छ । कहिलेकाही आउँछु भनेर जवाफ फर्काएका थिए । आवश्वयक पर्दा आउन मिल्ने र धेरै ठाउँमा यस्तो भइरहेको जवाफ माथि जवाफ फर्काए ।

‘सरकारी विद्यालयमा बेथिति देखिएको छ । आफु निर्वाचित भएदेखि चासो बढाएको छु,’ गाउँपालिका अध्यक्ष यादवले भने,‘स्थानीयवासीले गुनासो गरेपछि अनुगमनलाई तिव्र बनाएको छ । श्रीमतिको ठाउँमा श्रीमान भेटिएपछि प्रअ विनितालाई स्पष्टीकरण सोध्न शिक्षा शाखालाई लगाएको छु ।’ त्यती गर्दा पनि सुधार नआए आवश्यक कारवाही प्रक्रिया बढाउने उनले बताए ।

स्थानीयवासीका अनुसार श्रीमतिका साट्टो विद्यालयमा पढाउन आएका विन्दी यादव अवकास प्राप्त प्रअ हुन् ।