बद्री नारायण यादव
सिरहा,२९ कार्तिक । बदर मत घटाउन चिन्ह पहिचानका लागि एमाले जसपा गठबन्धनको नाटक टोलीले सचेतना छर्दै आएका छन् । आसन्न निर्वाचनको समय नजिकिएसँगै उक्त नाटक टोलीले सिरहा क्षेत्र नं.३ को विभिन्न स्थानमा नाटक मञ्चन गर्ने कार्य गर्दै आएका हुन् ।
मञ्चन गरिदै आएको नाटकमा एउटा नेताले आफु उम्मेदवार रहेको बताउदै भन्छन,‘मलाई भोट दिनुस म रक्सी दिन्छु ।’ रक्सीको लोभमा मतदाता भनिएकाले उनकै प्रचारमा लाग्छन् । प्रचार गर्ने क्रममै अर्को उम्मेदवार आएर भन्छन्,‘उसले के दिएको छ कि प्रचार गर्दै छौं । मैले रक्सी, मासु र पैसा पनि दिन्छु, मेरो प्रचार गर्नु र जिताउनु ।’

रक्सी, मासु र केही पैसाको लोभबाट रक्सी मात्र दिएको उम्मेदवारको नामै बिर्सेर अर्को उम्मेदवारको पक्षमा प्रचार गर्न थाल्छन् । तेश्रो नेताले उनको श्रीमति र छोरालाई कस्तो नेतालाई मतदान गर्ने भनी सिकाइरहेका हुन्छन् र त्यतिकैमा गाउँभरीको जिम्मा लिएर रक्सी, मासु र पैसा लिएका पनि आइपुग्छ ।
भोटको दिलाउने जिम्मा लिएर मासु, रक्सी, र पैसा लिएका उनको श्रीमति, छोरा र नेताबीच गफगाफ भइरहेकै अवस्थामा दुबै नेता भोट माग्दै आइपुग्छन् । उनलाई दुबै नेताले भन्छन्,‘रक्सी, मासु र पैसा दिए तर मेरो भोटको अवस्था के छ । अर्को नेतले पनि त्यहि सोध्छ ।’ दुबै नेताको कुरा सुनेर उनको श्रीमति रिसाउन थाल्छिन् ।
रिसाउदै उनको श्रीमतिले भन्छिन्,‘भोट रक्सी, मासु र पैसा दिने नेतालाई हाल्न सकिदैन् । जसले विकास पूर्वाधार, शिक्षा, स्वास्थ्य, कृषि, युवा रोजगार र जेष्ठ नागरिकको सम्मान हुने कार्य गर्छ उसैलाई भोट दिन्छु ।’ श्रीमतिको भनाई सुनेर रक्सी, मासु र पैसा लिएकाले भन्छन्,‘के–के को लोभमा परेर गाउँको विकासका कुरा बिर्सेको थिए । याद गराउनु भएकोमा खुसी छु । म पनि विकासप्रेमी नेतालाई नै भोट दिन्छु ।’
रक्सी, मासु र केही पैसाको लोभलाई त्यागेर सबै जनाले एकजुट भएर विकासप्रेमी नेता पहिचान गर्न सफल भएको र त्यो उम्मेदवारहरु एमाले जसपा गठबन्धनबाट सिरहा क्षेत्र नं. ३ को प्रतिनिधिसभा सदस्यमा लिलानाथ श्रेष्ठको सुर्य छापा, सिरहा क्षेत्र नं.३ (१) प्रदेशसभा सदस्यमा मनोज कुमार सिंहको सुर्य छाप र सिरहा क्षेत्र नं. ३ (२) प्रदेशसभा सदस्यमा रेणु यादवको छाता छापमा मतदान गर्ने भनी सामुहिक रुपमा सहमति जनाउदै सबैलाई त्यही छापमा मतदान गर्न आग्रह गर्छन् ।
पुजा मण्डल, अजय असगरुवा, अर्जुन महतो लगायतका कलाकारहरु नाटक टोलीमा रहेका छन् । सिरहा क्षेत्र नं.३ को गोलबजार, देवीपुर, विष्णुपुर, अर्नमा, महनौर लगायतका स्थानमा उक्त नाटक टोलीले नाटक मञ्चन गरिसकेको आयोजकले बताएका हुन् ।