सुरेन्द्रकुमार कामतिनेकपा (एमाले) सिरहाले करार सेवाका कर्मचारी हटाइएको घटनामा नेकपा (माओवादी केन्द्र)का नेताले हस्तक्षेप गर्ने कार्य अमान्य रहेको जनाएको छ। नेकपा (एमाले) जिल्ला कार्य समितिले सिरहामा पत्रकार सम्मेलन आयोजना गरी यस्तो धारण व्यक्त परेको हो।

 आफ्नो दलको नेतृत्व रहेको पालिकामा यस अघिका जनप्रतिनिधिले नियुक्त गरिएका कार्यकर्ता, परिवारका सदस्य, नातागोतालाई अपारदर्शी तरिकाले गरेको नियुक्त गरी आर्थिक व्यभार थपिएकोले हटाइएको प्रष्टिकरण एमालेले दिएको छ। 

नेकपा (एमाले) जिल्ला अध्यक्ष चन्देश्वर मण्डलले सिरहाको गोलबजार, भगवानपुर, धनगढीमाई, कर्जन्हा, नरहा लगायतको पालिकाबाट करार सेवाका कर्मचारीको पुनः म्याद नथप्ने निर्णय गरेको र त्यसलाई राजनीतिक रंग दिन लागेको जनाएका छन्।

सिरहाको गोलबजार नगरपालिकाले करार सेवाका कर्मचारीलाई म्याद नथप्ने निर्णय गरेको र त्यस विरुद्धमा नेकपा माओवादी केन्द्रका प्रदेश सांसद जगत यादवले अगुवाई गरी भड्काउ भाषण गर्नु गैरजिम्मेवार कार्य भएको अध्यक्ष मण्डलले पत्रकार सम्मेलनमा जनाएका छन्। 

‘माओवादी केन्द्रका जिम्मेवार नेताहरुले पदीय जिम्मेवारी र मर्यादाको ख्याल नगरी भडकाउने कार्य गरेको छ,’, अध्यक्ष मण्डलले भने,‘लोकतान्त्रिक आचरण विपरीतका कार्य रोक्नुपर्छ । यसले द्वन्दको अवस्था सृजना गर्न सक्छ । जिम्मेवार नेतृत्वको ध्यान पुगोस्।’

गोलबजार नगरपालिकामा निर्वतमान मेयर देवनाथ साहका भाई रामनारायण साह (सहायक कम्प्युटर अपरेटर), सरोज साह, नाती मनिष कुमार साह (ओभरसियर) र भदहा विजय कुमार साह (सहायक कम्प्युटर अपरेटर), माओवादी नेता कसम लामाका भाई नरेश लामा (अहेव), जगत कुमार श्रेष्ठको छोरा सुजन श्रेष्ठ र भाई टंक कुमार श्रेष्ठ, जगदिश साहको छोरी कल्पना कुमारी साह (सहयोगी), भतिजा सुमित चन्द सुमन (ओभरसियर), जिवन कुमार यादवको छोरी मनिषा कुमारी यादव (सहायक कम्प्युटर अपरेटर), सलो सुमित चन्द सुमन (ओभरसियर) पदमा नियुक्त रहेको मेयर श्याम श्रेष्ठले जनाएका छन्।सभार नयाँ पत्रिका