बरियारपट्टी ।सिरहाको बरियारपट्टी गाउँपालिका–३स्थित बरियारपट्टीको स्वास्थ्यचौकीका सभा हलमा स्वास्थ्यकर्मीका लागि सातदिने बृहत पोषण प्याकेज सम्बन्धी क्षमता अभिवृद्धि तालिम आजदेखि सुरु भएको छ ।
बरियारपट्टी गाउँपालिकाको स्वास्थ्य शाखाले तालिमको आयोजना गरेको हो । गाउँपालिकाका उपाध्यक्ष ममता कुमारी यादवले एक कार्यक्रमकाबीच तालिमको उद्घाटन गरे ।
एक हप्तासम्म तालिममा सिकेका सीप,ज्ञानलाई आ-आफ्नो कार्यक्षेत्रमा पुगेर कार्यान्वयन गर्न र आगमी दिनमा कुपोषणमुक्त समाज निर्माणमा लाग्न उपाध्यक्ष ममता कुमारी यादवले सुझाव दिनु भयो ।
पोषण स्थितिमा सुधार ल्याउने उद्देश्यले बृहत पोषण प्याकेज सम्बन्धी तालिमको आयोजना गरिएको गाउँपालिकाका स्वास्थ्य शाखा प्रमुख रामजुलुम मण्डलले जानकारी दिए । एक हप्ताका लागि आयोजना गरिएको तालिममा सो गाउँपालिकामा कार्यरत स्वास्थ्यकर्मीहरुको सहभागिता रहेको छ ।
‘स्वास्थ्यकर्मीको क्षमता अभिवृद्धिका लागि तालिम आयोजना गरिएको हो’, मण्डलले भने । ‘तालिममा सिकेका कुरा स्वास्थ्यकर्मीले आ–आफ्नो कार्यक्षेत्रमा लागू गर्नेछन् ।’
पालिकाको उपाध्यक्ष ममता कुमारी यादवको अध्यक्षतामा भएको उद्घाटन कार्यक्रममा गाउँपालिकाका प्रमुख प्रशासकीय अधिकृत रन्जित जंग अधिकारी , स्वास्थ्यकर्मी,पत्रकारको उपस्थिति रहेको थियो ।
सम्वन्धित समाचार
:
