जयनगर। भारत भ्रमणमा रहेका प्रधानमन्त्री शेरबहादुर देउवा र भारतीय समकक्षी नरेन्द्र मोदीले रिमोट थिचेर जनकपुरधाम–जयनगर रेलको उद्घाटन गरेसँगै जयनगरबाट जनकपुरका लागि रेल छुटेको छ ।
उद्घाटनलगत्तै देउवा र मोदीले हरियो झण्डा देखाएपछि रेल जयनगरबाट जनकपुरतर्फ हिँडेको हो । रेलले आज भारतीय र नेपाली केही यात्रु बोकेका छन् । जयनगरदेखि जनकपुरको कुर्था करिब ३५ किलोमिटर रहेको छ ।
जनकपुर पुगेर रेल पुनः जयनगर फर्किने र भोलिबाट नियमित सेवा सुरु हुने रेल्वे कम्पनीका महाप्रबन्धक निरञ्जन झाले जानकारी दिए । जनकपुरदेखि जयनगरसम्म जेनेरलमा १ सय र एसीमा ३५० रुपैयाँ भाडा तोकिएको छ ।
हैदराबाद हाउसमा मोदी र देउवाले गरेको रेल उद्घाटन हेर्न जनकपुर र जयनगरमा ठूलो स्क्रिनको व्यवस्था मिलाइएको थियो ।
गत फागुन १ देखि उक्त रेल विनायात्रु गुड्दै (ड्राई रन हुँदै) आएको थियो। उद्घाटन भएसँगै अब आइतबारदेखि सर्वसाधारणले रेल चढ्न पाउनेछन्।उद्घाटन समारोह सहभागी हुन जिल्ला प्रशासन सिरहाको प्रजिअ लालबाबु कवारी,उप अनुसन्धान निर्देशक तुलसी प्रसाईं ,भिआइपीदेखि सर्वसधारणको भीड जयनगर स्टेसनमा लागेको थियो ।
