रामचन्द्र यादवकै कारण कांग्रेस निर्वाचन अन्यौलमा !

लहान । नेपाली कांग्रेस सिरहा जिल्ला कार्य समिति चयनका लागि हुने निर्वाचन वर्तमान सभापति रामचन्द्र यादवकै कारण अन्यौलमा परेको आरोप नेताहरुले लगाएका छन् ।

बुधबार सिरहामा भएको कांग्रेस नेताहरुको भेलामा यस्तो भनाई नेताहरुले व्यक्त गरेका छन् । ‘नेपाली कांग्रेस जस्तो पार्टीमा सिरहामा न त उद्घाटन सत्र भएको छ । न कतै बन्द सत्र भएको छ’, जिल्ला सचिव पञ्चलाल महतोले भने,‘यो सभापति रामचन्द्र यादवको असफलता हो । उनको कार्यकालमा कुनै गतिलो काम हुन सकेनन् । कार्यसमितिमा कुनै विषयमा छलफल हुन दिइरहेको छैन् ।’ आफुले पटक पटक विधि पद्धतीमा हिडाउन प्रयास गरेपनि सभापति यादवकै हठका कारण नसकेको उनले दुखेसो पोखे ।

फाल्गुन २० गते निर्वाचनको मिति तोकिएको छ । तर, न त निर्वाचन अधिकृतले कार्यक्रम निकाल्न सकेको छ । न मतदान स्थल टुङ्गो लागेको छ । होला कि नहोला निर्वाचन कांग्रेसीहरु अन्यौलमा परेको छ । ‘सभापति यादवले एकलौटी गर्न खोजेपछि अहिले यो अन्यौलता सृजना भएको छ,’महासमिति सदस्य रामदयाल यादवले भने,‘यस पटक कांग्रेस निर्वाचनमा बलमिचाई चल्दैन । कांग्रेसको भविष्य बचाउन अहिलेको नेतृत्व फेर्नुपर्छ । नयाँ नेतृत्वमा आउनुपर्छ ।’ त्यसका लागि रामसुन्दर चौधरीको प्यानल उपयुक्त रहेको उनले तर्क गरे ।

सिरहा लगायत देशभरिकै अन्य जिल्लामा पनि सदरमुकाममै कांग्रेसको अधिवेशन हुँदै आएको छ । यसपालि पनि अन्य जिल्लामा त्यही भएको छ । सिरहामा रामचन्द्र यादवको पक्षले गोलबजार प्रस्ताव गरेपछि विवाद सृजना हुने देखिएको छ ।

‘सदरमुकाममा पार्टी कार्यालय छ । शान्ति सुरक्षा छ । पहिलेदेखि त्यही हुँदै आएको छ,’कांग्रेसका एक नेताले भने,‘त्यसमा विवाद सृजना गराउनु उचित छैन् ।’ रामचन्द्र यादव यसपाली कांग्रेसको निर्वाचनमा आफु हार्ने देखेपछि यस्तो विवाद गराउन खोजेको उनको आरोप छ ।

यता, सभापति रामचन्द्र यादव निकट स्रोतका अनुसार बिहिबार ८ बजे बैठक बसेर निर्वाचन विषयमा छलफल हुने जनाएको छ ।