सिरहा । चिसो बढेसँगै सिरहामा निमोनिया, रूघाखोकी तथा दमरोगका बिरामीको सङ्ख्या बढ्दै गएको छ । चिसो शुरू भएयता अस्पताल तथा स्वास्थ्य संस्थामा बिरामीको सङ्ख्या बढ्दै गएको हो ।
पहिले दैनिक १०/१५ जना मात्र निमोनिया, रूघाखोकी तथा दमका बिरामी आउने गरेकामा हाल दैनिक २०/२५भन्दा बढी बिरामी उपचारका लागि अस्पतालमा आउने गरेको बरियारपट्टी स्वास्थ शाखा प्रमुख रामजुलुम मण्डलले जनाएको छ ।
चिसो बढेसँगै मौसमी रुघाखोकीलगायत अन्य खालका बिरामीको सङ्ख्यामा वृद्धि भएको औरही स्वास्थ्य शाखा प्रमुख उपेन्द्र कुमार यादवले बताए। चिसोले बिरामी हुनेमा बालबालिका र वृद्धवृद्धा बढी छन् ।
मङ्सिर पहिलो सातादेखि सिरहामा विस्तारै चिसो बढ्न थालेपछि मौसमी रूघाखोकी, निमोनिया, ज्वरो आउने तथा अन्य खालका बिरामीको सङ्ख्यामा वृद्धि भएको शाखा प्रमुख यादवको भनाइ छ ।
चिसोको समयमा भाइरस सक्रिय भएर बालबालिका र वृद्धवृद्धालाई असर पार्ने भएकाले चिसोबाट बच्न न्यानो लुगा लगाउने, तातो, झोलिलो खानेकुरा खानुपर्ने अमरगढी औरही स्वास्थ्य शाखा प्रमुख उपेन्द्र कुमार यादवले बताए । ‘चिसोबाट जोगिन स्थानीयवासीले हिटर अथवा आगो बालेर झ्यालढोका हावा नछिर्ने गरेर बन्द गर्छन् । यस्तो अवस्थामा निस्सासिएर ज्यान जाने सम्भावना हुन्छ’, उनले भने, ‘झ्याल खुला राख्नुपर्छ ।
चिसो समयमा बालबालिकामा निमोनियाको समस्या र अन्य व्यक्तिमा रूघाखोकीलगायतको समस्या हुने भएकाले घरपरिवारका सदस्यले हेरचाहमा विशेष ध्यान दिनुपर्ने उनको भनाइ छ ।
पानी उमालेर खाने तथा घरवरिपरि सरसफाइ गर्दा रोगबाट बच्न सकिन्छ ।’ चिसोमा कोरोना भाइरस सक्रिय हुने भएकाले चिसोबाट बच्न विशेष सावधानी अपनाउनुका साथै रुघाखोकी लम्बिएमा वा स्वास्थ्यमा थप समस्या आएमा स्वास्थ्य संस्थामा गएर उपचार गर्न स्वास्थ्यकर्मीले सुझाव दिएका छन् ।
सम्वन्धित समाचार
:
