काठमाडौं । नेपाली कांग्रेसको १४ औं महाधिवेशनमा शेरबहादुर देउवा र शेखर कोइरालाबीच प्रतिस्पर्धा हुँदैछ। सभापतिका अन्य उम्मेदवारहरु प्रकाशमान सिंह, विमलेन्द्र निधि र कल्याण गुरुङ रिङआउट भएपछि दुई जनाबीच प्रतिस्पर्धा हुने भएको हो।
दोस्रो चरणको निर्वाचनमा बढी मत ल्याउने उम्मेदवार विजयी हुने भएको छ। यसअघि सभापति देउवा एक्लैले २२५८ मत ल्याएका थिए भने शेखर कोइराला, प्रकाशमान सिंह र विमलेन्द्र निधिले क्रमशः १७२९, ३७४, २३६ र २० मत ल्याएका थिए। यी तीनै जना उम्मेदवारहरुले डा. कोइरालालाई सहयोग गर्ने बताएका छन्।
निधिले त पहिलो चरणको निर्वाचनभन्दा पहिले नै आफूले शेखरलाई सहयोग गर्ने बताएका थिए भने प्रकाशमानले देउवालाई सहयोग गर्ने बताए पनि उनका मतदाताहरुले भने देउवालाई स्वीकार गर्ने पक्षमा छैनन्। पछिल्लो समय नेतृत्व पुस्तान्तरण जरुरी भएको र त्यसपछि मात्रै पार्टी रुपान्तरण सम्भव हुने भएकोले देउवाको विकल्प शेखर नै भएको मतदाताको बुझाइ रहेको छ।
त्यसैगरी प्रदेश २ का आठै जिल्लाका महाधिवेशन प्रतिनिधिहरुले अब पूर्णरुपमा शेखरलाई मतदान गर्ने भएका छन्। यसअघि प्रदेश २ का अधिकांश मत विभाजन भएको भए पनि दोस्रो चरणमा भने पूर्णरुपमा शेखरलाई जिताउनुपर्ने भन्दै सबै जिल्लाका महाधिवेशन प्रतिनिधिहरुबीच आन्तरिक सहमति भएकोसमेत बताइएको छ।
त्यसैगरी सोमबारको मतदानमा सहभागी नभएका रामचन्दै पौडेल पनि शेखरलाई जिताउनका लागि मंगलबार बिहान चियापानको आयोजना गरेका थिए। उक्त चियापानमा समेत शेखरको पक्षमा व्यापक नाराबाजी भएको थियो।
प्रदेश २ को सबै मतहरु शेखरको पक्षमा पर्दासमेत उनको जित सुनिश्चित देखिएको छ। यसअघि अलग्गै प्रतिस्पर्धा गरेकी सुजाता कोइरालाले पनि सभापतिको निर्वाचनका लागि भने शेखरलाई नै सहयोग गर्ने भएकी हुन्।
आफ्नो प्रतिक्रिया दिनुहोस् !