काठमाडौं । नेपाल विश्व हिन्दु महासंघले बङ्गलादेशमा रहेका अल्पसंख्यक हिन्दु समुदाय माथि निरन्तर भईरहेको हिंसात्मक घटनाको बिरोधमा काठमाडौंस्थित बङ्गलादेश दूतावासलाई ज्ञापन पत्र बुझाएको छ।
नेपालका लागि बङ्गलादेशी राजदूत सलाउद्दीन नोमान चौधरी मार्फत बङ्गलादेशी प्रधानमन्त्री “शेख हसिना वाजेद” लाई नेपाल विश्व हिन्दु महासंघका केन्द्रीय वरिष्ठ उपाध्यक्ष एवं संगठन विभाग प्रमुख विजय प्रकाश निषाद, केन्द्रीय उपाध्यक्ष डा. गणेश प्रसाद आचार्य तथा केन्द्रीय कोषाध्यक्ष सत्यदेवी सेढाई सहितको टोलिले भेटेर ज्ञापन पत्र बुझाएका हुन् ।
नेपाल विश्व हिन्दु महासंघको केन्द्रीय अध्यक्ष डा. केदारनाथ दाहाल तथा केन्द्रीय सचिव अभिषेक तिवारीद्वारा संयुक्त रूपमा उल्लेखित ज्ञापन पत्रमा बङ्गलादेशमा रहेका अल्पसंख्यक समुदाय र तिनका आस्था माथि बारम्बार यस्ता अमानवीय घटनाहरु हुँदै आएको प्रति महासंघ गम्भीर रूपमा चिन्तित रहेको भनिएको छ।
महासंघले बङ्गलादेश सरकारलाई अल्पसंख्यक समुदाय, उनीहरुको आत्मविश्वास र रक्षाको लागि ठोस प्रतिबद्धताका साथ अगाडि आउन आग्रह गर्दै जबरजस्ती धर्म परिवर्तन गराउने कार्य विरुद्ध बङ्गलादेश क्षेत्र भित्र अल्पसंख्यक समुदायको सुरक्षाको लागि कडा कानून प्रवर्तनको माग समेत गरेको छ।
महासंघका केन्द्रिय वरिष्ठ उपाध्यक्ष विजय प्रकाश निषाद सहितको टोलिद्वारा बङ्गलादेश दूतावासलाई हस्तान्तरित उक्त ज्ञापन पत्रमा बङ्गलादेशमा रहेका अल्पसंख्यक समुदायहरुसंग नेपाल विश्व हिन्दु महासंघको गम्भीर सहानुभूति रहेको साथै अन्तर्राष्ट्रिय समुदाय र संयुक्त राष्ट्र मानव अधिकार परिषदलाई यस्तो हिंसा र हमलाहरुलाई गम्भीरतापूर्वक लिन समेत अनुरोध गरिएको छ।
