२० असोज, २०७८
वर्षौ वर्षदेखि ऐलानी जग्गामा बस्दै आएको सुखीपुर नगरवासी गाउँमै जग्गा धनी दर्ता प्रमाण पुर्जा पाएपछि हर्षित भएका छन् ।

सिरहाको सुखीपुर नगरपालिका वडा नम्बर १ र ९ का ३ सय १८ जनाले गाउँमै जग्गा धनी दर्ता प्रमाण पुर्जा पाएपछि निकै खुसी भएका छन् । नापी कार्यालय लहान, सिरहा र भूमि अधिकार मंच सिरहाको सहकार्यमा बुधबार सुखीपुर नगरपालिकाको मोहनपुर कमलपुर गाँउमा एक कार्यक्रमका बीच ३ सय १८ घरधूरीलाई जग्गाधनी लालपुर्जा हस्तान्तरण गरेको गरेको नापी कार्यालय लहनका प्रमुख संजयकुमार सिंहले जानकारी दिए ।

नापी प्रमुख सिंहले घरदैलोमै जग्गाधनीको लालपुर्जा वितरण गर्दा भित्रै देखि नै खुशी महसूस भइरहेको बताए ।

गाउँका सोझासाझाहरुले गाउँ ब्लक जग्गाको प्रमाणपत्र बिना झनझट पाएकोमा उनीहरुसँगै आफु पनि निकै खुसी भएको छु । उनीहरूको पीडामा मल्हम लगाउने अवसर पाएकोमा खुसी रहेको नापी प्रमुख सिंहले भने । सुखीपुर नगरपालिका वडा नम्बर ९ का वडा अध्यक्ष रमेश ठाकुरले वडाबासीहरूको अनुहारमा मुस्कान हेर्दा वडा अध्यक्षको हैसियतले आफू पनि सफल भईरहेको महसुस भएको बताए । धेरै मिहिनेत र परिश्रम पश्चात जग्गा धनी लालपूर्जा वितरण भएको वडाध्यक्ष ठाकुरले बताए ।

नापी कार्यालय लहानका टोली प्रमुख रतन प्रसाद साहले पहिलो चरणको जग्गाधनी प्रमाण पुर्जा वितरण गरिसकेपछि अर्को चरणमा गाउँको जग्गा नापी कार्य गरी पूनःलालपुर्जा वितरण गरिने बताए । जग्गाधनी प्रमाणपत्र पाएपछि वडा नं १ की दुर्गीदेवी मोची भन्छिन् लालपुर्जा पाएपछि निकै नै खुशी महसुस भएको छ । दायाँबायाँ तिरबाट च्याप्नेहरु पनि अब च्याप्न नसक्ने भने ।

मेरो नाउँमा जग्गा भएपछि सरकारी कारोवार गर्न पनि सकिने उनले भने । भूमि अधिकार मञ्च सिरहाका कार्यक्रम संयोजक अरुण सदाले बाँकी घरधुरी हरुलाई पनि जग्गा धनी प्रमाण पत्रको लागि समन्वय गरेर अगाडि बढ्ने बताए । भूमी अधिकार मंच कै समस्तीलाल आलेले नापी गर्न छुट भएकाहरुलाई पनि नापी गराई जग्गाधनी प्रमाण पत्रको पुर्जा दिलाउनका लागि समन्वय गर्ने बताए ।

बिहान ७ बजेदेखि हुने कार्यक्रम सुखीपुर नगरपालिकाका नगरप्रमुख रामऔतार यादवले समयमा नआइदिदा सारहे नौ बजेदेखि जग्गाधनी प्रमाणपत्र वितरण भएको स्थानीयहरुले गुनासो पोखे । मेयर यादवकै छिमेकमा कार्यक्रम हुदाँ पनि मेयर यादवले वास्तै गरेनन् । १३ चाटी फोन गर्दा पनि समयमा आइदिएन र अटेर गरेको स्थानीयहरुको गुनासो थियो ।