काठमाडौं । जनता समाजवादी पार्टी नेपाल (जसपा)का अध्यक्ष महन्थ ठाकुर समूहका केही सांसद अर्का अध्यक्ष उपेन्द्र यादव समूहमा लागेपछि काठमाडौंको अपार्टमेन्टमा फ्ल्याट नै उपहार पाएका छन्।
पार्टीका अर्का अध्यक्ष महन्थ ठाकुरका पक्षका केही सांसदहरू अमृता अग्रहरि, नरमायाँ ढकाल, रानी मण्डल र प्रमोद साह पनि यादव पक्षमा गएको जनाइएको छ ।
महन्थ ठाकुरका पक्षका रुही नाज, रामदुलारी खतवनीलगायत पनि उपेन्द्र समूहतिर आकर्षित भएको खबर छ । एकजना चल्तापूर्जा सांसदले त उपेन्द्र यादव समूहमा प्रवेश गरे वापत सनसिटी अपार्टमेन्ट पेप्सीकोलामा फ्लैट नै उपहार पाएको खबर छ ।
जसपाको यादव समूहको संसदीय दलको बैठकले वर्तमान प्रधानमन्त्री शेरबहादुर देउवा नेतृत्वको सरकारमा सहभागी हुने निर्णय गरेको छ ।
जसपाको तत्काल कायम रहेको सांसद सङ्ख्याको बहुमत सांसद सहभागी संसदीय दलको बैठकले सरकारमा सहभागी हुने निर्णय गरेको हो । जसपाका कार्यकारिणी सदस्य एवम् सांसद मोहम्मद इस्तियाक राईले पार्टीको तत्काल कायम ३२ सांसदमध्ये १९ जनाको उपस्थितिमा सम्पन्न बैठकले सत्ता पक्षको बेञ्चमा बस्ने निर्णय गरेको जानकारी दिए । राईका अनुसार न्यूनतम साझा कार्यक्रमका आधारमा पार्टीका मुद्दालाई उठाएर सरकारमा सहभागी जनाइने बैठकले निर्णय गरेको छ । पुनर्स्थापित प्रतिनिधि सभाको बैठक आज साउन ३ गते आइतबार अपराह्न बस्दैछ ।
जसपाको पार्टी आधिकारिताको विवाद निर्वाचन आयोगमा टुङ्गो लागेको छैन । आयोगले आइतबारदेखि पार्टीको विवादका सम्बन्धमा गठन गरेको इजलासबाट छलफल हुने र तीन दिनभित्र निर्णय आउने जनाइएको छ ।
जसपा यादव समूहको साउन २ गतेको बैठकमा १७ सङ्घीय सांसद र तीन राष्ट्रिय सभाका सदस्य गरी २० सदस्य सहभागी भएको सांसद राईले बताए । जसपाको दुवै सदनका सांसदको सङ्ख्या ३५ छ । सङ्घीय सांसद ३२ र राष्ट्रिय सभामा तीन सांसद रहेका छन् ।
शेरवहादुर देउवाको पक्षमा मतदान गर्ने र सरकारमा सहभागी हुँदा यादव पक्षले पाँच मन्त्रालय पाउने गरी सहमति भएको खबर छ ।
आफ्नो प्रतिक्रिया दिनुहोस् !