वीरगन्ज,११ जेठ /
नेकपा (एमाले)बाट निष्कासित नेता भीम रावलले नागरिकतासम्बन्धी विवादित ट्वीट हटाएका छन् । वीरगन्जमा नागरिकता लिनेको भीड लागेको भन्दै ट्वीट गरेका नेता रावललाई अनेरास्वीवयुका नेता प्रशान्त यादवले यो ट्वीट भ्रामक रहेको भन्दै उनलाई मोबाईलमा सन्देश पठाएपछि केहि ढिला गरेर भएपनि हटाउन बाध्य भएका हुन ।
नेता यादवले मोबाईलमा सन्देश पठाएको केहि बेरमा उनले यादवलाई कुरा गर्दै यो ट्वीटलाई हटाउन भनेका थिए ।
सरकारले नागरिकतासम्बन्धी अध्यादेश जारी गरेपछि सोमबार उनले वीरगन्जमा नागरिकता लिनेको भीड लागेको भन्ने ट्वीट गरेका थिए । तर भ्रामक रहेको भन्दै धेरैले आलोचना गरेपछि रावलले सो ट्वीट हटाएका हुन ्।
उनले ट्वीटमा लेखेका थिए,’वीरगंजमा नागरिकता लिनेको भीड लागेको र त्यसमा भारतबाट आउनेको ठूलो संख्या रहेको समाचार आयो।’
उनले प्रधानमन्त्री केपी शर्मा ओलीले जनतालाई घरमा बन्द गरेर विदेशीलाई चकलेट बाँडेजस्तै गर्न लागेको भन्दै प्रश्न उठाएका थिए ।
’प्रम केपी ओलीको निषेधाज्ञा जनतालाई घरमा बन्द गरेर नेपाली नागरिकता विदेशीलाई समेत चकलेट बाँडेजस्तै गर्नलाई हो कि ? नेपाली जनतालाई जवाफ चाहियो। सम्पूर्ण देशभक्त नेपाली राष्ट्र जोगाउन सक्रिय बनौं!,’ रावलले लेखेका थिए।
मंगलबार ट्वीट गर्दै उनले समाचार पुरानो रहेको हुँदा ट्विट हटाएको बताएका छन्। ’मैले वीरगंजमा नागरिकता लिनेको भीड देखियो भन्ने समाचार आयो सरकारले जनतालाई जवाफ देओस् भनेर सोध्नु कुनै गलत कुरा होइन। सरकारले प्रष्ट पारे भइहाल्यो ।
तर उक्त समाचार पुरानो भनी ध्यान आकर्षित गराउनु हुने सबैलाई धन्यवाद दिँदै मेरो त्यो ट्वीट हटाउने जानकारी गराउँछु,’ उनले भनेका छन्।
आफ्नो प्रतिक्रिया दिनुहोस् !