वीरगन्ज,२२ माघ
पर्साको पर्सागढी नगरपालिकामा कर्मचारीहरु समयमा नआएपछि सेवाग्राहीहरु आक्रोशित भएर प्रमुख प्रशासकीय अधिकृत शालिक राम ढकालको कार्यकक्षमा तालाबन्दी गरेका छन । शुक्रबार अपरान्ह २ बजेसम्म नगरपालिकाका प्रमुख प्रशासकीय अधिकृत सहितको कर्मचारी नआएपछि सेवाग्राही दिनभरी कुरेर तालाबन्दी गरेका हुन ।
नगरपालिकाको प्रमुख प्रशासकीय अधिकृतलगायतका कर्मचारी समयमा नआउँदा स्थानीयबासी समेत रहेका अनेरास्ववियुका केन्द्रिय सदस्य बिकेश यादवको अगुवाईमा तालाबन्दी भएको हो ।
नगरपालिकाको प्रमुख प्रशासकीय अधिकृतलगायतका कर्मचारी समयमा नआउँदा विभिन्न प्रकारका आवश्यक काम लिएर टाडाटाडाबाट आएका सेवाग्राही निरास भएर फर्किने गरेकाले तालाबन्दी गरीएको अनेरास्ववियुका केन्द्रिय सदस्य यादवको बताए ।

काम विशेषले पुगेका सेवाग्राहीका अनुसार प्रमुख प्रशासकीय अधिकृत शालिक राम ढकाल विगत ३ दिनदेखि कार्यालयमा उपस्थित छैनन् । कार्यालय प्रमुख नै नहुँदा ३ दिनदेखि आफ्नो काम नहुन नसकेका तालाबन्दी गर्नुपरेको उनले बताए ।
नगरपालिकाका अन्य कर्मचारी अनुसार प्रचण्ड माधव समूहको नेकपाले गरेको नेपाल बन्दका कारण अधिकृत ढकाल कार्यालय आउँन नसकेको कार्यालयका कर्मचारीहरुले बताएका छन ।
तर अधिकृत ढकाल भने प्रचण्ड माधव समूहले गरेको हिजोको बन्द भन्दा पहिलादेखि नै कार्यक्रमबाट अनुपस्थित छन् । बिहिबार बन्द नभएपनि उनी गाडी नचलेको बहाना बनाउँदै कार्यालय आएका छैनन् । कर्मचारीहरु यसरी नआउँदा जनप्रतिनिधिले समेत कुनै चाँसो नदेखाएको स्थानीयहरुले आरोप लगाएका छन ।