वीरगञ्ज । चीनमा उईगुर समुदायका मुसलमानमाथि भइरहेको दमन र मानवअधिकार हननको विरोध गर्दै वीरगञ्जमा मुस्लिम समुदायले भव्य प्रदर्शन गरेको छ ।
जिल्ला प्रशासन कार्यालय पर्साका प्रमुख सहायक जिल्ला अधिकारीलाई चीनमा उईगुर समुदायमाथि भइरहेको दमनको विरोधमा नेपाली मुस्लिम समुदायले ज्ञापन पत्र बुझाएको मौलाना अलि असगर मदनीले जानकारी दिएका छन् ।
उनीहरूले उईगुर मुलसमानको मानवअधिकारको रक्षा गर, उईगुर समुदायमाथि भएको अत्याचार बन्द गर भन्दै प्रदर्शन गरेका हुन् ।
जमीअत उलमाए नेपालले चीनमा रहेका १८ लाख उईगुर समुदायमाथिको दमन रोक्न माग गर्दै पर्सा जिल्ला प्रशासन अगाडि प्रदर्शन गरेका थिए ।
यसअघि, नेपाली मुस्लिमहरूले बिहीबार काठमाडौं र रुपन्देहीमा चीनविरुद्ध प्रदर्शन गरिसकेका छन् । नेपाली मुलसमानहरूले काठमाडौंस्थित चिनियाँ राजदूतावासमा ज्ञापन पत्र समेत बुझाइसकेका छन् ।
चिनियाँ सरकारले १८ लाख उईगुर मुसलमानहरूलाई कैद गरेर शिविरमा राखेर यातना दिएको आरोप छ ।
चीनमा उईगुर मुसलमानहरूलाई रोजा बस्न र बुर्खा लगाउन बन्देज गरेको भन्दै नेपाली मुसलमानहरूले चिनियाँ सरकारको विरोध गरेका छन् ।
चीनका उईगुर मुस्लिम समुदायमाथि भइरहेको चरम दमन, शोषणको विरोध गर्दै प्रदर्शन भएका हुन् ।
प्रदर्शनमा सहभागीहरू चीनविरुद्ध लेखिएका व्यानर, प्लेकार्डहरू बोका थिए । विरोध प्रदर्शनमा उत्रिएकाहरूले चिनियाँ सरकारलाई उईगुर मुसलमानहरूको मस्जिद भत्काउने कार्य बन्द गर्न समेत चेतावनी दिएका छन् ।
‘चीनमा उईगुर मुस्लिममाथिको अत्याचार बन्द गर’, उईगुर मुस्लिमलाई स्वतन्त्रता देउ’, उईगुर मस्लिमको मानवअधिकार बहाली’ गर जस्ता नारा लगाएका ब्यानर नेपाली मुस्लिमहरूले बोकेका थिए ।
