प्रधानमन्त्री केपी शर्मा ओलीले कोरोनाभाइरसका संक्रमितले उपचार गर्न सक्दिनँ भन्ने स्वघोषणा गरे सरकारले उपचार गरिदिने बताएका छन्।
शुक्रबार भिडिओ सन्देश सार्वजनिक गर्दै प्रधानमन्त्री ओलीले कोरोनाबारे विभिन्न अफवाहहरू फैलिए पनि ती सत्य नभएको बताए।
‘महामारीमा नागरिकको रक्षा गर्नु सरकारको नि:सर्त दायित्व हो। तपाईंहरू मतबाट निर्वाचित सरकार त्यो दायित्वबाट विमुख हुन सक्दैन/भएको छैन,’ प्रधानमन्त्री ओलीले भने,‘तपाईंहरू निश्चिन्त हुनुस् कोरोना संक्रमितको परीक्षण र उपचारको प्रबन्ध सरकारले गर्छ।’
केही दिनअघि सरकारले स्वास्थ्यकर्मी, सफाइकर्मी र गरिब नागरिकको मात्र उपचार सरकारले गर्ने बताएको थियो। सरकारको उक्त निर्णयको चौतर्फी विरोध भएको थियो।
प्रधानमन्त्री ओलीले त्यस्तो विरोधलाई अफवाह र हल्ला बताएका छन्। सरकारले हुने र नहुने सबैको स्वास्थ्य सेवामा समान पहुँच बनाउन त्यस्तो आग्रह गरिएको बताएका छन्।
‘केही दाजुभाइ तथा दिदी बहिनीले आफ्नै खर्चमा निजी अस्पतालमा उपचार गरिरहनुभएको छ। त्यो उहाँहरूले राज्यलाई गरेको सहयोग हो,’ प्रधानमन्त्री ओलीले भने,‘सक्दिनँ भनेर स्वघोषणा गरेका सबैको उपचार सरकारले गर्छ।’
उनले सरकारले प्रभावकारी कदम चालेकाले नै नेपालमा कोरोनको मृत्युदर ०.६ प्रतिशत माथि नगएको दाबी गरे।
प्रधानमन्त्री ओलीले यसपालि पोहोर-परारभन्दा फरक तरिकाले दशैं मनाउन पनि आग्रह गरेका छन्।
‘जो जहाँ छौं त्यहीँ दशैं मनाउन आग्रह गर्छु,’ प्रधानमन्त्री ओलीले भने,‘मैले पनि यसपालि बालुवाटारमा सार्वजनिक टीका ग्रहणको कार्यक्रम नराख्न निर्देशन दिइसकेको छु।’
प्रधानमन्त्रीको सम्बोधनको पूर्णपाठ
आदरणीय दिदीबहिनी तथा दाजुभाइहरू,
नेपालीहरुको ठूलो चाड, बडादशैं शुरु भइसकेको छ। यस महान् अवसरमा सर्वप्रथम म स्वदेश तथा विदेशमा रहनुभएका सम्पूर्ण दिदीबहिनी तथा दाजुभाइहरुमा सुस्वास्थ्य, प्रगति र समुन्नतिको लागि हार्दिक शुभकामना व्यक्त गर्न चाहन्छु।
बडा दशैं लगायतका हाम्रा चाडपर्वहरु यत्तिकै प्रचलनमा आएका होइनन्। विभिन्न ऐतिहासिक पृष्ठभूमिका आधारमा हाम्रा चाडवाडहरुको विकास भएको छ। समाज निर्माण हुने क्रममा, सभ्यताहरु विकसित र सुगठित हुने क्रममा यस्ता चाडपर्वहरु निर्माण भएका छन्। सामाजिक सुप्रबन्ध कायम गर्नका लागि निर्माण भएका यस्ता चाडपर्वहरु, समयक्रममा हासिल भएका अनुभव र अनुभूतिहरुबाट समृद्ध हुँदै प्रयोग र प्रचलनमा रहेका हुन्। नाता, साइनो र सम्बन्ध, तिनको महत्व र मर्यादा एवं तिनको परिपालना र सुप्रबन्धका लागि हाम्रा पूर्वज र अग्रजहरुले बहुतै बुद्धिमत्ताका साथ यस्ता विभिन्न चाडपर्व र उत्सवहरुको विकास गरेका हुन्।
यी चाडवाडहरु केवल पर्व र उत्सवहरु मात्रै होइनन्, सामाजिक प्रबन्धका आधारहरु हुन्। हाम्रो सभ्यता, हाम्रो संस्कृति र हाम्रा मूल्य मान्यताहरु यिनै सामाजिक प्रबन्धहरुका आधारमा विकसित भएका छन्। खासमा चाडपर्वहरु समाजलाई एकीकृत र आकर्षित गर्ने चुम्बकहरु हुन्। साथै, समाजलाई सहज सञ्चालन गर्ने लुब्रिकेन्टस हुन्। त्यसैले, यी चाडपर्वहरुका सकारात्मक अन्तर्यहरु, जो महान् र जिवन्त छन्, यिनलाई अपनाउनु र अगाडि बढाउनु आवश्यक छ। त्यसैले यस्ता चाडपर्वहरुलाई नितान्त पुरातन मान्यताका रुपमा मात्रै बुझ्दा र अस्वीकार गर्दा सिङ्गो समाजलाई निरर्थक, निरस र प्रयोजनहीन जस्तो बनाउँछ।
तर चाडवाडका नाममा हुने गरेका केही नकारात्मक पक्षहरुलाई भने हटाउनु आवश्यक छ। औचित्य र आवश्यकताको वास्तै नगरी, आफ्नो सामथ्र्यको समेत ख्याल नगरी आँखा चिम्लिएर उत्सव मनाउँदा फजूल खर्चमा हौसिने जस्ता अभ्यास कुनै पनि कोणबाट उचित होइनन्। यस्ता अभ्यासलाई सच्याएर हाम्रा चाडपर्वहरुलाई मितव्ययी र उचित बनाउन हामी सबै सजग र सचेत रहनु आवश्यक छ। भनिन्छ नि, बोटबिरुवाको रक्षा गर्नु भनेको ऐंजेरु पाल्नु होइन।
सेतोपाटी
