रून्केश कामती
सिरहा । विवाद र आलोचनामा पर्दै आएको औरही गाउँपालिकामा सुधारका संकेतहरु देखिएको छ ।
निमित्त प्रमुख प्रशासकीय अधिकृतको भरमा चल्दै आएको औरही गाउँपालिकामा अहिले नीतिगत निर्णयसँगै सुधार देखिन थालेको छ । औरही गाउँपालिकाको प्रमुख प्रशासकीय अधिकृतका रुपमा कमलदेव यादव पुगेसँगै लामो समयदेखि देखिएको विवाद र नीतिगत समस्याहरु समाधानमा सक्रियता देखिएको छ ।
दुई साता अघि औरही गाउँपालिकाको प्रमुख प्रशासकीय अधिकृतको जिम्मेवारी पाएसँगै यादवले जनप्रतिनिधीवीचको विवाद मत्थर पार्ने कामसँगै सुधारका विभिन्न निर्णय गरेका छन् । नियमित रुपमा कार्यालय पुग्ने गरेका उनी सवैभन्दा पहिले सिरहा सदरमुकाममा रहेको औरही गाउँपालिकाको ‘सम्पर्क कार्यालय’ हटाएका छन् ।
गाउँपालिकाकै प्रशासनीक भवनमा वसेर सेवा दिनुपर्ने भएकोले फजुल खर्च हुनेगरी राखिएको प्रशासकीय भवन हटाईएको प्रशासकीय अधिकृत यादवले बताए । ‘नागरिकलाई असहज हुनेगरी रहेका कार्यालय हटाएको छु,’उनले भने,‘कर्मचारीले प्रमुख प्रशासकीय भवनबाटै पालिकाको सेवा दिनुपर्छ ।’
यससँगै नयाँ योजना कार्यान्वय गर्न वडा कार्यालयहरुलाई पत्राचार गरिएको भन्दै प्रमुख प्रशासकीय अधिकृत यादवले भने,‘कुन विधि र प्रकृयाबाट योजना कार्यान्वयन हुने हो त्यही वारेमा पत्राचार गरेको छु । यसले योजनालाई समयमै कार्यान्वयनमा ल्याउन सजिलो हुन्छ ।’
गाउँपालिकाका विभिन्न शाखाहरुको व्यवस्थापनमा यस अघि देखिएका कमजोरीलाई हटाउने कोसिस गरेको उनले बताए । ‘स्वास्थ्य, शिक्षा, पशु, कृषि जस्ता विषयगत शाखाहरु व्यवस्थापन भएको छ,’उनले भने,‘विषयगत शाखा व्यवस्थितसँगै काम पनि छरितो र पारदर्षी हुन्छ ।’
‘अहिले गाउँपालिकावासीलाई कार्यालय यहाँ छ भन्ने विश्वास लाग्न थालेको छ,’उनले भने,‘यो गाउँपालिकाप्रति सकारात्मक सोचको विकास भएको छ । यसमा सवैको सहयोग र योगदान जरुरी छ ।’
प्रमुख प्रशासकीय अधिकृत यादवले जनप्रतिनिधीहरु पनि काम गर्न उत्साहित भएको भन्दै ५ बेड क्षमताको कोभिड अस्पताल र माध्यमिक विद्यालय औरहीमा रहेको क्वारेनटाईन हटाएर पठनपाठन सुचारु गर्ने
तयारी गरिएको बताए । ‘गाउँपालिकालाई विकास र सुशासनको पथमा अगाडी बढाउनु जरुरी छ,’उनले भने, ‘यसका निम्ति निर्वाचित जनप्रतिनिधीसँगै स्थानीयको पनि सहयोग हुनुपर्छ ।’
औरही गाउँपालिकाका स्थानीय अगुवा नवल यादवले नयाँ हाकिम आएसँगै गाउँपालिका यहाँ रहेको अनुभूती हुन थालेको बताए ।
आफ्नो प्रतिक्रिया दिनुहोस् !