फिरोज सिद्दिकी,
लहान । लहान नगरपालिकाले गैरकानूनी रुपमा शिक्षा ऐन, नियमाबलि विपरित विभेदकारी तरिकाले शिक्षकको सरुवा गरेको भन्दै शिक्षक आन्दोलित भएका छन ।
स्थानीय सरकारलाई शिक्षकको दरबन्दी मिलान गर्ने अधिकार भए पनि सरुवाको अधिकार केन्द्र सरकारलाई मात्र भएकोले नगर शिक्षा समितिले कार्यादेशभन्दा बाहिर गएर एकमुस्ठ सरुवा गरेको भन्दै संयुक्त संघर्ष समितिले आन्दोलन गर्नु परेको विहिबार पत्रकार सम्मेलन गरी जानकारी गराएका हुन् ।
लहान नगरपालिकाले नगर शिक्षा समितिको जेठ २८ गतेको निर्णय तथा साउन १४ गतेको सरुवा पत्र अनुसार आधारभूत तहका शिक्षकहरुलाई सरुवा गरेका छन् ।
संयुक्त संघर्ष समितिका संयोजक नेपाल शिक्षक संघ नगर कार्य समिति लहानका अरविन्द कुमार दास, सहसंयोजकद्वय नेपाल राष्ट्रिय शिक्षक संगठनका उद्धव कुमार लामा र संघीय समाजवादी शिक्षक फोरम नगर कार्य समिति लहानका नेपाली साहको संयुक्त हस्ताक्षरित प्रेस विज्ञप्तिमा भनिएको छ– शिक्षा ऐन २०२८, शिक्षा नियमावली २०५९ नवौं संशोधन कायम रहेको र संघीय शिक्षा ऐन नबनि सकेको अवस्थामा संविधानले स्थानीय तहलाई दिएको २३ बुँदे अधिकारमा शिक्षक सरुवा, बढुवा उल्लेख नरहेकोले सामुदायिक विद्यालयका शिक्षकहरुको सरुवा, बढुवा गर्ने अधिकार शिक्षा विकास तथा समन्वय इकाईलाई मात्र रहेको छ । शिक्षण अवधि ११ महिना मात्र रहेका महिला शिक्षकलाई अपायक सरुवा र अवकाश प्राप्त शिक्षकको समेत सरुवा गर्नुले हचुवाको भरमा प्रतिशोधपूर्ण तवरले गरिएको सरुवा मान्य नहुने उल्लेख गरिएको छ ।
विज्ञप्तीमा नेपालका ७ सय ५३ स्थानीय तहले कही कतै यसरी एकैपटक सबैको सरुवा नगरेकोले यस्ता सरुवाले शिक्षकहरुको मानसिक्ता खलबलिएको, गुणस्तरको नाममा सामुदायिक विद्यालयको शैक्षिक वातावरण अझ ध्वस्त बनाउने दुष्प्रयास भएको भनिएको छ ।
वर्षांैदेखि पायक पर्ने विद्यालयमा बसिरहेका शिक्षकलाई राजनीतिक आस्थाका आधारमा अपायक सरुवा भएको दाबी नेपाल शिक्षक संघ लहानका अरविन्द कुमार दासको छ । शिक्षा समितिले गरेको सरुवा सिफारिस न्यायोचित नभएको भन्दै निर्णय खारेज गर्नुपर्ने शिक्षक संयुक्त संघर्ष समितिको माग रहेको छ । निर्णय खारेज नभए चरणबद्ध आन्दोलन गर्ने चेतावनी दिएका छन् ।
यता लहान नगरपालिकाका शिक्षा संयोजक राजकुमार साहका अनुसार– सरुवा हचुवाको भरमा भएको छैन । सबैको सुझाव सल्लाह लिएर ऐनसँग मिल्ने आधार तयार गरेर अघि बढेको छ । आन्दोलनरत शिक्षकहरुसँग कैयौपटक गरेको अन्तरक्रिायामा शिक्षक सरुवाको बारेमा तपाईहरुको विचार के छ भने सोध्दा सरुवा प्रक्रिया थाल्नु भनेर मलाई नै घचघचाउने गर्नु हुन्थ्यो । आज सरुवा प्रक्रियालाई अघि बढाँउदा किन आपति भयो ? राजनीतिकरण गरयो । दलीय आडमा यसलाई कार्यान्वयन गर्न नदिने धमासका स्वरहरु निकाल्न थाल्नुभयो, यसले हामीलाई गम्भीर बनाएको छ । हचुवाको भरमा होइन, लहान नगरपालिकाले ऐन बनाएर पास गरी अघि बढेको सरुवा प्रक्रियालाई अघि वढाएको हो । उहाँले लामो अध्ययनपछि शिक्षकको सरुवा भएको भन्दै कहींकतै अप्ठेरै भएको भए सुधार गर्नेसमेत बताउनु भयो ।
