दैलेख । जिल्ला सदरमुकाममा रहेको नारायण नगरपालिका २ जना जनप्रतिनिधि र ७ जना नगरपालिकाका कर्मचारीसहित नौ जनामा कोरोना पुष्टि भएको छ । जिल्ला अस्पताल दैलेखको प्रयोगशालामा गरिएको पीसीआर परिक्षण गर्दा ९ जनामा कोराना पुष्टि भएको हो ।
संक्रमण पुष्टि हुनेमा एक महिला जनप्रतिनिधि र एक वडा अध्यक्ष रहेको दैलेख अस्पतालका कोरोना फोकलपर्सन थिरप्रसाद रेग्मीले जानकारी दिए । उनले भने, ‘७ जना कर्मचारीमा पनि कोरोना संक्रमण देखिएको छ । सबैको अवस्था सामान्य छ ।’ संक्रमित कर्मचारीहरु होम आइसोलेसनमा छन् । दुई जना जनप्रतिनिधिहरु भने दैलेख अस्पतालको आइसोलेसनमा उपचार गराइरहेका छन् ।
नगरपालिकाले असार १४ र १६ गते दुई चरणमा ४८ जना जनप्रतिनिधि र कर्मचारीहरुको स्वाब संकलन गरी परिक्षण गर्दा ९ जनामा कोरोना पुष्टि भएको थियो । जनप्रतिनिधि र कर्मचारीहरुमा कोरोना संक्रमण देखिएपछि नगरपालिकाको सेवा प्रवाहमा समस्या नगर प्रमुख रत्नबहादर खड्काले बताए । ‘असार मसान्त भएको र केही कर्मचारीमा कोरोना पुष्टि हुँदा कार्यालयलमा सयौंको संख्यामा सेवाग्राहीको भिड लाग्ने गरेको छ’, उनले भने ।
उपभोक्ता समितिबाट भुक्तानी लिन आएका र अन्य कामको लागि कार्यालयमा आएका सर्वसाधारणहरुलाई सेवा प्रवाहमा समस्या देखिएको सूचना अधिकारी प्रकाशकुमार बिसीले बताए । ‘कार्यालयबाट हुने कामका लागि नगरपालिका अगाडी टेबुल राखिएको छ । सेवाग्राहीहरुले टेबुलमा फाइलहरु जम्मा गर्नुहुन्छ । उक्त फाइलहरु दोस्रो दिन कार्यालयले अध्ययन गरेर मात्र अगाडि बढाउने ब्यवस्था मिलाइएको छ । यसले गर्दा कार्यालयको सेवा प्रभावित भएको छ ।’
स्वास्थ्यकर्मी र सुरक्षाकर्मीमा संक्रमण पुष्टि
कोरोना भाईरसको संक्रमणबाट बच्न धमाधम भारतबाट घर फर्किएका व्याक्तिको क्वारेन्टाईनमा सुरक्षार्थ खटिएका सुरक्षाकर्मी र स्वास्थ्कर्मी समेत कोरोना पुष्टि भएको छ । कोरोना पुष्टि भएका ३३ जना सुरक्षाकर्मी र ६ जना स्वास्थ्यकर्मी रहेका छन् ।
कोरोना पुष्टि हुनेमा २० जना सशस्त्र प्रहरी, ९ जना नेपाल प्रहरी र ४ जना नेपाली सेना गरी ३३ जना सुरक्षाकर्मीहरुमा कोरोना संक्रमण पुष्टि भएको स्वास्थ्य सेवा कार्यालय दैलेखका जनस्वास्थ्य अधिकृत थीरप्रसाद रेग्मीले बताए ।
कर्णाली प्रदेशमा सबभन्दा धेरै कोरोना संक्रमण फैलिएको दैलेख जिल्लामा पछिल्लो समय पीसीआर परीक्षणको दायरा बढाइएको छ । नारायण नगरपालिका आफैंले पीसीआर मेसिन खरिद गरी सञ्चालनमा ल्याएको छ । एक पटकमा ९६ स्वाब परीक्षण गर्न मिल्ने उक्त मेसिनमा २४ घण्टामा दुई पटक परीक्षण गर्न मिल्ने कोरोना फोकल पर्सन रेग्मीले बताए । ‘एक लटमा ९६ वटा स्वाब परीक्षण गर्न सक्ने क्षमता छ, मेसिन दुई सिफ्टमा सञ्चालन गर्न सकिन्छ,’ रेग्मीले भने, ‘दिनमा दुई लट परीक्षण गर्न मिल्ने भएकाले १९६ वटासम्म परीक्षण हुन्छ ।’
आफ्नो प्रतिक्रिया दिनुहोस् !