काठमाडौँ । रुपन्देहीको बुटवल उपमहानगरपालिका–१२ हरियाटोलबाट खानतलासीको क्रममा प्रहरीले २२ केजी ५०० ग्राम प्रतिबन्धित लागूऔषध चरेस बरामद गरेको छ ।
५ नम्बर प्रदेश प्रहरी कार्यालयको विशेष टोलीले सोमबार हरियाटोलमा बस्ने धन बहादुर दमाईको खाली घर खानतलासी गर्दा लुकाइछिपाइ राखेको उक्त परिणामको लागूऔषध बरामद गरेको हो ।
लागूऔषध चरेससहित गुल्मी मदानेका २९ वर्षीय मेघराज गिरी र रुकुम सिस्नेका ३५ वर्षीय रतिभान दमाईलाई पक्राउ गरी हिरासतमा लिइएको प्रदेश ५ का प्रहरी प्रमुख रवीन्द्र धानुकले जानकारी दिए । बरामद चरेसको बजार मुल्य अन्दाजी ८ करोड रहेको उनले बताए ।
तस्करीका लागि लुकाएर राखिएको चरेस बरामद गरेसँगै तस्करीमा अन्य व्यक्तिहरुको पनि संलग्नता रहेको पाइएको धानुकले बताए । उनले भने, ‘उनीहरुको खोजीकार्य भइरहेको छ ।’
रुकुम, रोल्पाहुँदै बुटवल भित्रिएको लागूऔषध नेपालगञ्ज हुँदै भारतसम्म कारोबार हुने गरेको ५ नम्बर प्रदेश प्रहरी कार्यालयका एसएसपी राजकुमार वैदवार बताउँछन् ।
‘झुक्याउँदै भारतसम्म ओसारपसार हुने गरेको हामीले पाएका छौं,’ एसएसपी बैदवारले भने, ‘लागूऔषधको अवस्था डरलाग्दो छ ।’ उनका अनुसार लागूऔषध कारोवारीका रूपमा समातिएकाहरू विपन्न र श्रमिक छन् ।
प्रहरीले उनीहरुलाई नियन्त्रणमा लिएर थप अनुसन्धान गरिरहेको जनाएको छ ।
आफ्नो प्रतिक्रिया दिनुहोस् !