सिरहा । सत्तारुढ नेपाल कम्युनिष्ट पार्टी (नेकपा) का दुई अध्यक्ष केपी शर्मा ओली र पुष्पकमल दाहालबीच बढेको दूरीलाई कम गर्न वार्ताको पहल भइरहेकाले स्थितिलाई नखबल्याउन दोस्रो पुस्ताका नेताहले खबरदारी गरिरहेका छन् ।
नेकपामा शीर्ष तीन नेता केपी शमा ओली, पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल निकट दोस्रो पुस्ताका युवा तथा नेताहरुले दुबै अध्यक्ष वार्तामा बसेर विवादलाई अन्त्य गर्नुपर्ने दबाव दिंदै स्थितिलाई थप बिग्रन नदिन खबरदारी गरिरहेका बेला सिरहाको मिर्चैयामा प्रधानमन्त्री ओलीको समर्थनमा नारा जुलुसहरु निस्किरहेका छन् । युवा तथा विद्यार्थीका नाममा सिरहाको मिर्चैयामा गरिएको प्रर्दशनमा ठूलो संख्यामा युवाहरुको सहभागिता रहेको थियो । पार्टीभित्र ओलीलाई प्रधानमन्त्री र अध्यक्ष दुवै पदबाट राजीनामा दिनुपर्ने माग स्थायी समितिमा उठिरहेको बेला प्रधानमन्त्री ओलीको समर्थनमा युवा तथा विद्यार्थीहरुले प्रदर्शन गरेका हुन् ।
उनीहरुले दुवै पदबाट ओलीलाई हटाउन नहुने भन्दै प्रदर्शन गरेका थिए । प्रदर्शनमा सहभागीले ‘सरकार ढाल्न पाइँदैन’, ‘आज होइन भोलिलाई, सिरहाको समर्थन ओलीलाई’ ‘ओली सिध्याउन किन यत्रो जोड, भारतीय विस्तारबाद नेपाल छोड’ उत्खनन् गर्नु छ कैयौं खानी, फिर्ता गर्नुछ हाम्रो कालापानी’ जस्ता नारा अंकित प्लेकार्ड बोकेर प्रर्दशन गरेका थिए ।
प्रदर्शनमा सहभागी युवा बैधनाथ साहले पाँच वर्षका लागि जनताले म्याण्डेड दिएर बनेको सरकारलाई बीचमा नै ढलाएर अस्थीरता सिर्जना गर्न खोजिएको भन्दै यसले देशलाई थप द्वन्द्वमा लैजाने बताए । देश कोरोना महामारीको संक्रमणविरुद्ध लडिरहेको अवस्थामा सरकारलाई सहयोग गर्नुपर्ने उनीहरुको भनाइ छ ।
