काठमाडौं, ७ असार । राज्य व्यवस्था तथा सुशासन समितिले संसद्मा पठाउन लागेको भनिएको नागरिकता ऐन संशोधन विधेयकको विरोधमा आन्दोलनका लागि एकजुट हुन डा.सीके राउत नेतृत्वको जनमत पार्टीले आह्वान गरेको छ ।
जनमत पार्टीका केन्द्रीय सदस्य चन्दन सिंहले आइतबार एक विज्ञप्ति जारी गरी यस्तो आह्वान गरेका हुन् ।
नेता सिंहले विज्ञप्तिमा भनेका छन्, ‘मधेशी, आदिवासी जनजाति, दलित, मुस्लिम, अल्पसंख्यक सहितका उत्पीडित वर्गका जनताहरूले पटक–पटक गरेको आन्दोलन र त्यसबाट प्राप्त उपलब्धिहरूप्रति प्रतिगामी र जनचाहना विपरीत रहेको छ ।’
दशकौंदेखि समान अधिकारका लागि भएका आन्दोलनहरू तथा ०६३÷०६४ सालमा भएको मधेश आन्दोलनको जगमाथि स्थापित नागरिकता सम्बन्धी अधिकारलाई खोस्ने र मधेशी, आदिवासी जनजाति, दलित, मुस्लिम, अल्पसंख्यक सहितका उत्पीडित वर्गलाई अनागरिक बनाउनेतिर लक्षित रहेकोले सो विधेयकको विरोधमा सम्पूर्ण जनता, नागरिक समाज र राजनैतिक पार्टीहरूलाई एकजुट हुन आह्वान गरिएको हो ।
कोभिड–१९ को महामारीले बन्दाबन्दी रहेको मौका छोपेर नेपाल सरकारले आन्दोलनका उपलब्धिहरू तथा जनताको अधिकार खोस्ने षड्यन्त्र गरे आफूहरु आन्दोलनमा उत्रिन बाध्य हुने सिंहले चेतावनीसमेत दिएका छन् ।
आफ्नो प्रतिक्रिया दिनुहोस् !