बारा । जीतपुर सिमरा नगर अस्पतालमा विशेषज्ञ डाक्टरबाट शल्यक्रिया सहितको उपचार सेवा समेत सुरु भएको छ । नगर अस्पतालले मंगलबारदेखि हड्डीको अपरेसन सुरु गरेको हो । वीरगन्ज महानगर ३२ घर भएका ४८ वर्षीय मेराजुन अन्सारीको दाहिने हातको शल्यक्रिया गरिएको हो ।

नगर अस्पतालमा अहिले बालरोग विशेषज्ञ, रेडियोलोजिष्ट, हाडजोर्नी विशेषज्ञ डाक्टर सहित २४ सै घण्टा फार्मेसी, ल्याब, प्रसूति र आकस्मिक सेवा सञ्चालनमा छ ।

रौनियारले शल्यक्रिया गर्ने क्रममा आउनसक्ने जटिलता समाधानका लागि फिजिसियन डाक्टर आवश्यक भएको र त्यसका लागि पहल भईरहेको बताए ।

उपमहानगरले प्राथमिक स्वास्थ्य केन्द्रलाई स्तरउन्नेत्ती गरेर २ वर्षअघि नगर अस्पताल सञ्चालनमा ल्याएको हो ।

केही वर्षअघिसम्म जीतपुसिमरा उपमहानगर र आसपास बिरामीहरु सामान्य उपचारका लागि वीरगन्ज,हेटौडा र भरतपुसम्म जाने गर्दथे  ।

वीरगन्ज स्थित नारायणी उपक्षेत्रिय अस्पतालमा समयमै उपचार नपाएका बिरामीहरु पनि पछिल्लो समय जीतपुर सिमरा नगर अस्पतालमा उपचारका लागि आउने गरेको अस्पताल प्रशासनले जनाएको छ ।

नगर अस्पतालकी स्वास्थ्यकर्मी रिकुं साहले पछिल्लो समय अस्पतालले महिलाहरूको पाठेघरको क्यान्सरको परीक्षण समेत सुरु गरेको बताइन् ।

‘प्रसूति सेवाका लागि शल्यक्रिया गर्नुपरेका हेटौडा वीरगन्ज रिफर गर्नुपर्ने बाध्यता छ, त्यो सेवा यहीबाट सुरु गर्न पाए महिला र बच्चाको स्वास्थ्यमा अझ राम्रो प्रतिफल दिन सक्थ्यौँ’ साहले भनिन् ‘जतिसक्दो छिटो दक्ष गाईनोकोलोष्टि डाक्टर व्यवस्थापन गर्न उपमहानगरलाई हाम्रो अनुरोध छ ।’

जीतपुर सिमरा अस्पतालमा आङ खस्ने समस्या लिएर महिलाहरू आउने गरेको साहले बताइन् । जीतपुर सिमरा अस्पतालमा दैनिक ५० जनासम्म महिलाहरू गर्भवती परीक्षण, परिवार नियोजन, र सुरक्षित गर्भपतनको सेवा लिइरहेका छन् ।

हाल नगर अस्पतालमा स्वास्थ्यकर्मी सहित ४४ जना कर्मचारी कार्यरत छन् । प्राथमिक स्वास्थ्य केन्द्रको पुरानो, साँघुरो भवनबाट सबैखाले सेवा दिन असहज भएकाले छिट्टै नयाँ भवन सञ्चालनमा ल्याउन अस्पताल प्रशासनले उपमहानगरलाई अनुरोध गरेको छ ।

उपमहानगरले करिब १७ करोड लागतमा १५ शय्याको सुविधा सम्पन्न आधुनिक नगर अस्पताल निमार्ण गरिसकेको छ ।

सो भवन बैशाखमा हस्तान्तरण भएर सञ्चालनमा आउने उपमहानगरले जनाएको छ ।