पोखरा । नेपाली कांग्रेसले आगामी फागुन २१ गते हुने प्रतिनिधिसभा सदस्य निर्वाचनका लागि नवलपुर क्षेत्र नम्बर १ मा गजेन्द्र आले मगरलाई उम्मेदवार बनाएको छ । ‘हेविवेट’ नेता एवं पूर्वमहामन्त्री डा। शशांक कोइरालाले ४ पटक चुनाव जितेको यो क्षेत्रमा पहिलो पटक स्थानीय नेताले पालो पाएका हुन् ।
यो क्षेत्र २०४८, २०५१ र २०५६ मा पनि कांग्रेसले नै जितेको थियो । हालसम्म अपराजित रहेका कारण नवलपुर १ लाई कांग्रेसको गढ मानिन्छ । गैँडाकोट नगरपालिका–१२ का स्थायी बासिन्दा आले नेपाली कांग्रेसका महासमिति सदस्य हुन् । उनी यसअघि २०७४ सालको स्थानीय तह निर्वाचनमा गैँडाकोट नगरपालिकाको मेयर पदमा झिनो अन्तरले पराजित भएका थिए ।
यस्तै क्षेत्र नम्बर २ बाट विष्णुप्रसाद लामिछानेले टिकट पाएका छन् । २०७४ मा प्रदेश सभा निर्वाचित उनी हाल कांग्रेस गण्डकी प्रदेश समितिको महामन्त्री छन् । उनलाई क्षेत्र नम्बर १ बाटै उम्मेदवार बन्ने बताइएको थियो । यद्यपि, २ बाट टिकट प्राप्त गरेका छन् । मतदातामाझ उनी पनि लोकप्रिय उम्मेदवार हुन् ।
